I dërguari special i qeverisë gjermane për Ballkanin Perëndimor, Manuel Sarrazin, ka thënë se liberalizimi i vizave për kosovarët është një nga hapat e domosdoshëm.

Sarrazin ka thënë se Qeveria e Kosovës është duke bërë reforma dhe se duan t’i shpërblejnë.

“Premtimi për zgjerim i bërë në Samitin e Selanikut të vitit 2003 vlen ende.

Për Bosnjë-Hercegovinën mbeten të plotësohen 14 prioritetet thelbësore dhe të zbatohen reformat, në mënyrë që t’i jepet statusi i kandidatit.

Në Kosovë qeveria është duke bërë reforma dhe ne duam t’i shpërblejmë.

Liberalizimi i vizave për qytetarët e Kosovës është një nga ato hapa të domosdoshëm që duhet vijojë.

Por edhe dialogu i normalizimit me Serbinë duhet të rifillojë dhe të dyja palët duhet të jenë të gatshme për progress”, ka thënë Sarrazin për DW.

Ai ka folur edhe për nismën e “Ballkanit të Hapur”, që kundërshtohet ashpër nga Kosova.

Sarrazin është shprehur skeptik për këtë nismë.

“Në thelb, unë jam shumë skeptik për Ballkanin e Hapur.

Duhet të jetë e qartë se iniciativat në rajon së pari duhet të jenë gjithëpërfshirëse dhe të ofrojnë mundësi reale për t’u përfshirë në to.

Dhe nga ana tjetër, është e rëndësishme që të mos hapen struktura paralele.

Përveç kësaj, duhet të jetë gjithmonë e qartë se në asnjë mënyrë ato nuk e zëvendësojnë anëtarësimin në BE”, ka deklaruar ai.

Manuel Sarrazin, 40 vjeç, ka qenë deputet i Bundestagut për Bündnis 90/Die Grünen nga viti 2008 deri në vitin 2021 dhe është President i Shoqërisë së Evropës Juglindore, institucioni më i rëndësishëm i konsultimit akademik dhe politik për çështjet e Ballkanit në Gjermani.

Që nga 1 marsi 2022, ai është përfaqësuesi special i Qeverisë Federale Gjermane për Ballkanin Perëndimor.